Mae Aberystwyth yn dref brifysgol fywiog ac yn gyrchfan glan môr gyda phromenâd a phier. Yn ogystal dyma yw lleoliad y ddrama deledu atmosfferig Y Gwyll.

Mae Aberystwyth yn lleoliad delfrydol i archwilio Llwybr Arfordir Cymru ar hyd Bae Ceredigion. Mae gan y dref a’r ardal ddewis eang o lefydd i aros ac mae gan Aberystwyth raglen flynyddol o ddigwyddiadau diwylliannol a chwaraeon.

Mae Aberystwyth yn gyrchfan siopa ar gyfer ardal eang o Ganolbarth a Gorllewin Cymru, felly mae nifer o siopau cadwyn manwerthu mawr naill ai yng nghanol y dref neu gerllaw. Ond y gwir bleser o siopa yn Aberystwyth yw’r siopau annibynnol niferus ac amrywiol a’r Farchnad Ffermwyr, a gydnabyddir yn un o’r rhai gorau yn y DU.

Does dim curo’r dewis o lefydd i fwyta yn Aberystwyth gyda chaffis, tafarndai a bwytai sydd yn cynnig cinio a byrbrydau yn ystod y dydd. Neu beth am dretio’ch hunan   gyda’r nos yn un o fwytai Aberystwyth – mae rhywbeth at ddant pawb,  gan gynnwys bwyd môr a physgod a sglodion traddodiadol, tapas Sbaeneg, bwyd Eidalaidd, Groegaidd neu Asiaidd, neu mwynhewch y dewis ar fwydlenni’r gwestai a’r bwytai ar lan y môr sy’n cynnig bwydydd Cymreig modern.