Yn hanesyddol, Llandysul oedd canolbwynt diwydiant gwlân Cymru, lle cyflogid miloedd o bobl yn ystod y chwyldro diwydiannol – yn wehyddion, nyddwyr, lliwyr, gweuwyr, llieinwyr a theilwriaid. Yr adeilad hynaf yn y dref fechan hon yw Eglwys Sant Tysul, sy’n dyddio’n ôl i’r 13eg ganrif.

Mae afon Teifi yn Llandysul yn enwog drwy’r byd fel lle i bysgota am frithyll, sewin ac eogiaid. Mae’r afon hefyd yn ganolfan canŵio dŵr gwyn mewn dyfroedd geirwon ac mae’r clwb canŵio lleol yn cynnig cyrsiau canŵio.​​  Yn ogystal, mae Llandysul yn dref ‘Croeso i Gerddwyr’ hefyd a’r ardal o gwmpas yn cynnig llwybrau cerdded bendigedig i’w dilyn.