Mae’r Gwasanaethau Brysbennu Integredig ac Asesu yn cynnwys tair elfen:

• Sifft
• Brysbennu
• Asesu

Sifft

Mae’n gweithredu fel ceidwad yr holl ymholiadau gan gynnwys Clic ac atgyfeiriadau electronig.  Bydd Sifft yn adolygu pob atgyfeiriad ac yn casglu gwybodaeth ychwanegol er mwyn gwneud penderfyniad ar y camau nesaf, er enghraifft uwchgyfeirio i Borth Cynnal (Diogelu), isgyfeirio i Borth Cymorth Cynnar, aseinio i Borth Gofal ar gyfer asesu integredig cymesur. Bydd Sifft hefyd yn rhoi gwybodaeth a chyngor lle’n briodol i gefnogi cydnerthedd teuluoedd lle nad oes angen cymryd camau pellach.

Brysbennu

Bydd Brysbennu Integredig yn ymgymryd ag asesiad cymesur gan ddefnyddio’r model Arwyddion Diogelwch i ddynodi pryderon y person a’i deulu, cryfderau a chytuno ar gynllun i ddatrys eu pryderon. Gellir dynodi asesiadau pellach yn dilyn ymholiadau Brysbennu.

Asesu

Bydd gweithwyr yn ymgymryd ag asesiad cleient a theulu os oes angen gan ddefnyddio dull sy’n cynnwys y teulu cyfan. Bydd y ffocws ar un o adfer ar gyfer oedolion lle caiff cynllun adfer ei ddatblygu i gynorthwyo’r teulu i adennill ei annibyniaeth.

Rolau dan y Rheolwyr Tîm

• Uwch-ymarferwyr
• Gweithwyr Cymdeithasol
• Cynorthwywyr Gwaith Cymdeithasol
• Cynorthwywyr Derbyn

Bydd yr Uwch-ymarferwyr yn Weithwyr Cymdeithasol cofrestredig profiadol ac yn meddu ar wybodaeth a dealltwriaeth o ddeddfwriaeth allweddol a Rheoliadau sy’n ymwneud ag oedolion a phlant. Bydd yr Uwch-Ymarferydd yn cefnogi’r rheolwyr tîm yn nhrefniadau dydd i ddydd Brysbennu Integredig ac yn goruchwylio staff gofal cymdeithasol eraill o fewn gwasanaeth Porth Gofal. Disgwylir i’r Uwch-ymarferydd ymgymryd â llwyth bach o achosion cymhleth.

Bydd gan Weithwyr Cymdeithasol ddealltwriaeth dda o ddeddfwriaeth allweddol a Rheoliadau mewn perthynas ag oedolion a phlant. Dyrennir achosion mwy cymhleth i Weithwyr Cymdeithasol er mwyn ymgymryd â’r asesiadau cleient a theulu ar gyfer oedolion a phlant gan ganolbwyntio’n benodol ar atal. Gofynnir am ddealltwriaeth dda o Deddf Galluedd Meddyliol 2005 a’r gallu i ymgymryd ag asesiadau galluedd a chyfarfodydd budd pennaf. 

Bydd Cynorthwywyr Gwaith Cymdeithasol o fewn Sifft yn adolygu a chasglu gwybodaeth ychwanegol, os oes angen, er mwyn gwneud penderfyniad ynghylch symud ymlaen at gau atgyfeiriad yn dilyn darparu gwybodaeth a chyngor i’r person. Bydd Cynorthwywyr Gwaith Cymdeithasol o fewn Asesiadau Porth Gofal yn gweithio gydag unigolion i ddatblygu nodau a chynllun adfer. Bydd Cynorthwywyr Gwaith Cymdeithasol hefyd yn ymgymryd ag asesiadau cleient a theulu gyda’r rhai ag anghenion nad ydynt yn rhai cymhleth. Bydd modd cyfnewid Cynorthwywyr Gwaith Cymdeithasol o fewn Sifft ac Asesu yn dibynnu ar y galwadau ar y gwasanaeth. 

Bydd Cynorthwywyr Derbyn yn cymryd cyfrifoldeb dros fonitro cyfrif e-bost cyffredinol Porth Gofal ac yn mewnbynnu atgyfeiriadau electronig ar y system Rheoli Cysylltiadau Cwsmeriaid (CRM) a WCCIS fel y bo’n briodol. Bydd y Cynorthwyydd Derbyn hefyd yn gwneud cyswllt â’r person neu bobl broffesiynol eraill i gasglu gwybodaeth ychwanegol yn dilyn atgyfeiriad electronig er mwyn symud yr atgyfeiriad i Sifft. Bydd y Cynorthwyydd Derbyn yn helpu’r Cynorthwyydd Gwaith Cymdeithasol wrth ymateb i ymholiadau am wybodaeth. Bydd y Cynorthwyydd Derbyn hefyd yn helpu’r Rheolwr Tîm i ddiweddaru cyhoeddiadau fel taflenni gwybodaeth.